ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಕ್ರೈಸ್ಟ್‌ಚರ್ಚ್, ಸೆ.3: ರಿಕ್ಟರ್ ಮಾಪಕದಲ್ಲಿ 7.2 ತೀವ್ರತೆಯ ಭೂಕಂಪವೊಂದು ನ್ಯೂಝಿಲ್ಯಾಂಡ್‌ನ ದಕ್ಷಿಣ ದ್ವೀಪವನ್ನು ಇಂದು ಅಪ್ಪಳಿಸಿದೆ ಎಂದು ಅಮೆರಿಕದ ಜಿಯಾಲಾಜಿಕಲ್ ಸರ್ವೆ ತಿಳಿಸಿದೆ. ಭೂಕಂಪದ ಕೇಂದ್ರವು ಕ್ರೈಸ್ಟ್‌ಚರ್ಚ್‌ನ ವಾಯವ್ಯಕ್ಕೆ 30 ಕಿ.ಮೀ ದೂರದಲ್ಲಿ 16.1 ಕಿ.ಮೀ ಆಳದಲ್ಲಿತ್ತೆಂದು ಅದು ಹೇಳಿದೆ. ಕ್ರೈಸ್ಟ್‌ಚರ್ಚ್ ನ್ಯೂಝಿಲ್ಯಾಂಡ್‌ನ ಮೂರ ನೆಯ ಅತಿ ದೊಡ್ಡ ನಗರವಾಗಿದ್ದು, 3.4 ಲಕ್ಷದಷ್ಟು ಜನಸಂಖ್ಯೆಯನ್ನು ಹೊಂದಿದೆ. ಪ್ರದೇಶದಲ್ಲಿ ಭಾರೀ ಹಾನಿ ಹಾಗೂ ವಿದ್ಯುತ್ ವ್ಯತ್ಯಯ ಉಂಟಾಗಿದೆಯೆಂದು ವರದಿ ಯಾಗಿದೆ.

ಭೂಕಂಪದ ಕೇಂದ್ರದ 100 ಕಿ.ಮೀ ವ್ಯಾಪ್ತಿಯ ಸಮುದ್ರದಲ್ಲಿ ಸುನಾಮಿ ಅಲೆಗಳೇಳುವ ಭೀತಿಯಿದೆಯೆಂದು ಪೆಸಿಫಿಕ್ ಸುನಾಮಿ ಮುನ್ನೆಚ್ಚರಿಕೆ ಕೇಂದ್ರ ತಿಳಿಸಿದೆ. ಭೂಕಂಪದಿಂದ ಅಂಗಡಿಗಳ ಸಾಲೊಂದು ಸಂಪೂರ್ಣ ಹಾನಿಗೊಂಡಿದೆಯೆಂದು ಪ್ರತ್ಯಕ್ಷದರ್ಶಿಯೊಬ್ಬ ತಿಳಿಸಿದ್ದಾನೆ. ಸ್ಥಳೀಯ ಕಾಲಮಾನ ಶನಿವಾರ ಮುಂಜಾನೆ 4:35ರ ವೇಳೆಗೆ ಈ ಭೂಕಂಪ ಸಂಭವಿಸಿದ್ದು, ಹೆಚ್ಚಿನವರು ಗಾಢ ನಿದ್ರೆಯಲ್ಲಿದ್ದರು. ಆದಾಗ್ಯೂ ಘಟನೆಯಲ್ಲಿ ಯಾವುದೇ ಸಾವುನೋವು ಸಂಭವಿಸಿದ ವರದಿ ಈವರೆಗೆ ಬಂದಿಲ್ಲ.