ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಹೊಸದಿಲ್ಲಿ, ಫೆ. 7: ದೇಶದಲ್ಲಿ ಅಂತರ್ಜಾಲ ಬರಹಗಳ ನಿಯಂತ್ರಣದ ಕುರಿತ ವಿವಾದದ ನಡುವೆಯೇ, ನಿಷೇಧಿತ ಔಷಧಿಗಳ ಆನ್‌ಲೈನ್ ವ್ಯಾಪಾರದ ತಡೆಗೆ ‘ನಿಯಂತ್ರಣ ಹಾಗೂ ಕಾನೂನು’ ಕ್ರಮಗಳನ್ನು ರೂಪಿಸಲು ಉನ್ನತ ಸಮಿತಿಯೊಂದನ್ನು ಸರಕಾರ ಇತ್ತೀಚೆಗೆ ರಚಿಸಿದೆ.

ಆನ್‌ಲೈನ್ ಔಷಧ ವ್ಯಾಪಾರವು ಮಾದಕದ್ರವ್ಯ ಕಳ್ಳ ಸಾಗಾಟಗಾರರು ಬಳಸುತ್ತಿರುವ ಅತ್ಯಂತ ‘ಮಾರಕ ಹಾಗೂ ಜಾಣತನದ ಕಾರ್ಯತಂತ್ರ’ ಎಂದು ಮಾದಕ ದ್ರವ್ಯ ತಡೆ ಪೊಲೀಸರು ವ್ಯಾಖ್ಯಾನಿಸಿದ್ದಾರೆ. ಇಂತಹ ಅಂತರ್ಜಾಲ ಔಷಧಾಲಯಗಳು ಒಡ್ಡಿರುವ ಬೆದರಿಕೆಯನ್ನು ತಡೆಯಲು ಸರಕಾರ ಕೆಲಸ ಮಾಡುತ್ತಿದ್ದು, ಅಂತಹ ವ್ಯಾಪಾರದ ವಿರುದ್ಧ ಕ್ರಮವನ್ನು ಬಲಪಡಿಸಲು ಮಾದಕ ದ್ರವ್ಯ ನಿಯಂತ್ರಣ ಬ್ಯೂರೋದ ಅಧೀನದಲ್ಲಿ ಸಮಿತಿಯೊಂದನ್ನು ರಚಿಸಿದೆ.

ಈ ಕಳ್ಳ ವ್ಯವಹಾರದಲ್ಲಿ ಕಪ್ಪು ಹಣ ಹಾಗೂ ಆರ್ಥಿಕ ಅಪರಾಧ ಚಟುವಟಿಕೆಗಳೂ ಒಳಗೊಂಡಿರುತ್ತವೆಂದು ಉನ್ನತ ಮೂಲಗಳು ತಿಳಿಸಿವೆ.

ಕೇಂದ್ರ ವಿತ್ತ ಸಚಿವ ಪ್ರಣವ್ ಮುಖರ್ಜಿ ನಿನ್ನೆ ಅನಾವರಣಗೊಳಿಸಿರುವ ಹೊಸ ಔಷಧ ನೀತಿಯ ಭಾಗ ಈ ಸಮಿತಿಯಾಗಿದೆ. ಇಂಟರ್ನೆಟ್ ಮೂಲಕ ಅಂತಹ ಚಟುವಟಿಕೆ ನಡೆಸುವ ವ್ಯಕ್ತಿಗಳು ಹಾಗೂ ಗುಂಪುಗಳನ್ನು ನಿಯಂತ್ರಿಸಲು ‘ಸೈಬರ್ ಗಸ್ತು ಘಟಕ’ದ ಸ್ಥಾಪನೆಯ ಬಗ್ಗೆಯೂ ಸಮಿತಿ ಪರಿಶೀಲಿಸಲಿದೆ.