ಸತ್ಯ ಎಲ್ಲೆಡೆಗೆ , ಜನದನಿಯ ಸಾರಥಿ , ವಾರ್ತಾಭಾರತಿ

ಮಡಿಕೇರಿ, ಮೇ 22: ಮಂಗಳೂರು ವಿಮಾನ ದುರಂತದಲ್ಲಿ ಕೊಡಗಿನ ಗೃಹಿಣಿಯೊಬ್ಬರು ಸಾವನ್ನಪ್ಪಿದ್ದಾರೆ. ನಾಪೋಕ್ಲು ಬಳಿಯ ಯವಕಪ್ಪಾಡಿ ಗ್ರಾಮದ ಅಪ್ಪಾರಂಡ ಮಂಡಣ್ಣ ಅವರ ಪುತ್ರಿ ಚಿತ್ರಾ (39), ಅವರ ಪತಿ ಜಯರಾಂ(42) ಹಾಗೂ 5 ವರ್ಷದ ಪುತ್ರ ರಾಹುಲ್ ವಿಮಾನ ಅಪಘಾತದಲ್ಲಿ ದುರಂತ ಅಂತ್ಯ ಕಂಡಿದ್ದಾರೆ.

ಚಿತ್ರಾರ ಕಳೆದ 12 ವರ್ಷಗಳ ಹಿಂದೆ ಕಂಕನಾಡಿಯ ವೀರನಗರದ ಜಯರಾಂರನ್ನು ವಿವಾಹವಾಗಿದ್ದರು. ದುಬೈಯ ಜಾಹೀರಾತು ಸಂಸ್ಥೆಯಲ್ಲಿ ಉದ್ಯೋಗಿಯಾಗಿದ್ದ ಜಯರಾಂ, ಇತ್ತೀಚೆಗೆ ಬೇರೆ ಕಂಪೆನಿಗೆ ವರ್ಗವಾಗಿದ್ದರು. ಈ ಹಿನ್ನೆಲೆಯಲ್ಲಿ ಚಿತ್ರಾ ಹಾಗೂ ರಾಹುಲ್‌ನನ್ನು ಸ್ವದೇಶದಲ್ಲಿ ಬಿಟ್ಟು ಹೊಸ ಉದ್ಯೋಗಕ್ಕೆ ಅಗತ್ಯವಾದ ದಾಖಲೆಗಳನ್ನು ಪಡೆದುಕೊಳ್ಳಲು ಭಾರತಕ್ಕೆ ವಿಮಾನದಲ್ಲಿ ಹಿಂದಿರುಗುತ್ತಿದ್ದರು.

ಇಂದು ಮುಂಜಾನೆ ಬಜ್ಪೆ ವಿಮಾನ ನಿಲ್ದಾಣದ ಸಮೀಪ ನಡೆದ ದುರಂತದಲ್ಲಿ ಜಯರಾಂ ಕುಟುಂಬ ಅಂತ್ಯ ಕಂಡಿದೆ. ಮೃತರ ಅಂತ್ಯಕ್ರಿಯೆಯನ್ನು ಮಂಗಳೂರು ಶಿವನಗರದಲ್ಲಿ ನಡೆಸಲಾಗುವುದೆಂದು ಚಿತ್ರಾರ ಕುಟುಂಬದ ಮೂಲಗಳು ತಿಳಿಸಿವೆ.